"Yo soy Sofonisba y quiero una calle..." mail art

A pasada semana tocou un obradoiro en nocturnia, o programa do concello de A Coruña que propón á mocidade da cidade actividades e talleres de ocio saúdable. Nesta ocasion fixemos mail art, arte postal. Cada participante fixo a súa tarxeta postal coa que respondemos a unha convocatoria en marcha, neste caso “Yo soy Sofonisba y quiero una calle en San Lorenzo de El Escorial”, convocatoria da artista Dora Román. Foi unha oportunidade de coñecer a Sofonisba Anguissola, a sua interesante obra e vida e poñer en valor ás mulleres pintoras invisibilizadas ao longo da historia. Moita creatividade abrollou esa tarde e saíron potentes traballos que están de camiño a San Lorenzo de El Escorial. Mocidade marabillosa e activa que se achegou a dar contido de calidade ao seu tempo.

Cumprimos obxectivos ao achegar á mocidade unha arte que permite a liberdade de fluír e crear sen xuízos reflexionando sobre unha temática proposta e divertindose a través da plástica. Coñecer outras formas de arte e comunicación, facer un envío e comunicarse por correo postal con outros territorios,  ampliar a nosa mirada sobre o mundo. Participar na reivindicación, de maneira creativa, para reclamar o nome das rúas das cidade para as mulleres pintoras e artistas, coñecer a figura de Sofonisba Anguissola.